Pas Dritës, edhe një klub tjetër i Superligës ka dalë kundër draft-statutit të Federatës së Futbollit të Kosovës, i cili do të qitet në votim në Kuvendin e Jashtëzakonshëm, i cili do të mbahet këtë të premte.
Bëhet fjalë për Trepçën ’89, një klub i zëshëm ky kur bëhet fjalë për parregullsitë dhe padrejtësitë në futbollin kosovar, shkruan “Gazeta Express”.
“Xehetarët” thonë se e kanë analizuar me kujdes të veçantë draft-statutin e FFK-së, ndërsa konsiderojnë se ky proces ka shkelje serioze të procedurave statutare dhe ligjore.
Këto janë evidentuar nga juristët e klubit mitrovicas, njëjtë si ata të Dritës, që gjetën shkelje një ditë më parë.
Prandaj, 89-shi kërkon që të mendojnë dy herë para se ta votojnë këtë draft-statut.
Mbrëmë, Drita me juristët e saj gjetën shkelje të mëdha në draft-statutit të FFK-së dhe bëri thirrje të mos-votohet ai, sepse, gjithnjë sipas gjilanasve, me të Federata e Futbollit nuk do të mundë të licencohet nga Ministria e Sportit. /Gazeta Express/
