Ende pa kaluar 12 orë nga video-adresimi i së premtes përmes të cilit kreu i LVV-së, Albin Kurti, tentonte ta bënte fajtore opozitën që vendi po shkon në zgjedhje të reja, Lëvizja Vetëvendosje që ai drejton ka dalë me një propozim e ofertë të re për PDK-në e LDK’në.
Pas një takimi të mbajtur me organet e partisë, Kurti ka kërkuar nga PDK e LDK që të propozojnë tre kandidatë për president që janë jashtë politikës, me qëllim që njëri prej tyre të zgjidhet për president.
Megjithatë PDK me në krye Bedri Hamzën e ka refuzuar një ofertë të tillë dhe vetë kryetari i kësaj partie e ka cilësuar si një manovër politike të Albin Kurtit.
“Ne jemi parti të ndryshme. PDK-ja e LDK-ja janë subjekte në vete. AAK-ja është në vete. S’e ka ftuar fare. Me LDK-në ka tjera oferta, me PDK-në kemi diskutuar për presidentin. S’është çështje e rehatimit të individit, por çështje serioze që ka mundur të diskutohet në tavolinë kur ishim bashkë, por s’ka pasur seriozitet nga VV-ja e s’ka as tash”, ka thënë Hamza sot.
Ndërkohë kreu i LDK-së, Lumir Abdixhiku, i është përgjigjur Kurtit me një kundër-ofertë. Ai ka kërkuar garanci nga Kurti për 66 votat e koalicionit qeverisës, që LDK të propozojë emrin e Vjosa Osmanit për presidente.
“I nderuar Kryeministër Kurti,Meqë po komunikojmë në distancë,Ju lutem përcaktohuni a doni marrëveshje politike me LDK-në, apo i doni 90 vota edhe me PDK-në. Nëse është kjo e dyta dhe nuk mundeni pa ta, atëherë nuk mund t’ju ndihmojmë. Kur të merreni vesh, e trajtojmë.Por, nëse doni marrëveshje politike me LDK-në, atëherë flisni me ne. Presidentin e propozojmë ne me plot pergjegjësi. Mund ta propozojmë edhe Vjosa Osmanin, nëse na i garantoni 66 vota për të”, ka shkruar sot Abdixhiku i cili paraprakisht kishte mbajtur edhe një konferencë për media.
Kreu i LDK-së i ka kërkuar Kurtit që të përcaktohet nëse është për marrëveshje politike me LDK’në.
Afati i fundit për zgjedhjen e presidentit është data 28 prill. Vendi shkon automatikisht në zgjedhje të reja në rast se partitë politike nuk do të arrijnë ta zgjedhin presidentin e ri./Express/
