Ballina Kult-Art Shkolla e Muzikës në Mitrovicë shënoi 65 vjetorin e punës së suksesshme

Shkolla e Muzikës në Mitrovicë shënoi 65 vjetorin e punës së suksesshme

Në një ambient të ngrohtë e me një program jashtëzakonisht të pëlqyer, (pardje)është shënuar 65 vjetori i punës të Shkollës së Muzikës “Tefta Tashko”, në Mitrovicë.

Drejtoresha e shkollës, profesoresha Valbona Prekazi, tha fillimisht se Shkolla e muzikës në Mitrovicë rrugëtimin e saj e ka nisur 65 vjet më parë, me misionin e çartë të edukimit të talenteve të rinj në kulturën muzikore dhe kjo ka bërë një pjesë të ndritshme të historisë së shkëlqyer të këtij qyteti.

“Nga kjo shkollë kanë dalë emra të mëdhenj e njerëz eminent, që e zhvilluan kulturën muzikore, si brenda, ashtu edhe jashtë shtetit të Kosovës. Nxënësit që kanë dalë nga kjo shkollë kanë arritur majat e suksesit nëpër skenat e famshme operistike gjithandej nëpër Evropë e deri në Amerikë. Ata po e bëjnë krenar qytetin e Mitrovicës dhe shtetin e Kosovës”, tha ndër të tjera drejtoresha Prekazi.

Drejtori i Drejtorisë së Arsimit në komunën e Mitrovicës, Iset Beka, tha se Mitrovica dhe qytetarët e saj mburren me shkollën e muzikës dhe me kuadrot e talentet që kanë dalë nga ajo

“Sukseset e shkollës janë jashtëzakonisht të mira. Prandaj ne si institucione duhet të bëjmë gjithçka që është e mundur që të krijojmë kushte sa më të mira pune për këtë fidanishte të talenteve të kulturës muzikore, duke filluar nga ndërtimi i një objekti modern e deri teka pajisja me instrumente të nevojshëm”, tha ndër të tjera ai.

Do theksuar se Shkolla e Muzikës “Tefta Tashko” në Mitrovicë, përgjatë 65 viteve të punës, plotë 51 vjet është drejtuar nga femrat.   

Ndërsa, programi i përgatitur nga nxënësit dhe profesorët e shkollës, si dhe nga ish nxënësit e saj, tani emra të njohur të muzikës në Kosovë e më gjerë, ishte jashtëzakonisht i bukur dhe u pëlqye shumë nga salla e mbushur përplot me qytetarë.

PËRGJIGJU

Please enter your comment!
Please enter your name here